Saturday, November 29, 2008

PACQUIAO MANIA

Sigurado ako nga naghinam-hinam na pud ang kadaghanan natong mga Pilipino sa umaabot na laban sa paboritong atleta o boksingero sa nasod na si Manny "Pacman" Pacquiao. Kini dili na ikalimod kay samtang ako naglakaw sa kadalanan sa Sugbu, bisan moagi pa ang kapin duha ka semana bag-o pagahimoon ang pag lantugi ni Manny batok kang Oscar "Golden Boy" Dela Hoya, daghan nang mga establisimiento ang nagpadagan sa ilang mga pagpahibalo kon promo nga cla modalit ug lunch buffet sa igong kantidad samtang ang mga kustomer motan-aw sa gitawag nga The Dream Match.

Daw damgo gayud kani nga panagsangga ni Pacman ug ni Golden Boy kay dugay nga panahon usa ang gihulat sa tanang sumosonod sa boksing bag-o kini nahinayon. Kay ang duha ka boksingero mahimo mang maingon na mga tinahod sa ilang duwa, daw murag duha ka dagkong bato nga nagbangga, dili na ikakurat nga ang ilang mga tagsa-tagsa ka partido mo-negotiate ug unsay ilang tan-aw nga angay madawat sa ilang manok.

Ako usa pud ka dakong (o gamayng) boxing fan apan karong buntaga, wa gihapon ako magdahom na ang mga promo kon advertisement kabahin sa The Dream Match moabot sa akong telepono sa panahon nga diha ako nitambong sa lubong sa akong uyuan na si anhing Job Bonotan Tabada kinsa among gihatod sa papahulayan sa iyang kalibutan-ong lawas didto sa Cebu South Memorial Park sa siyudad sa Talisay. Nihaom pud sa panahon ang pag-abot sa maong multi-media message kay ang nipanaw nakong uyuan usa pud ka dakong boxing fan gani ang iyang column sa Cebu Daily News ginganlan niya ug Straight Jab kon diretso nga sumbag kay ang jab mao man ang punch o sumbag sa atong linggwahi. Kani pud nga ngan sa iyang column daw tanghaga usab sa kaprangka sa iyang mga artikulo. Apan ang akong uyuan nailhan sa iyang pagka-objective. Nailhan sya nga moatake sa isyu but dili gayod mahimo nga personalan na ang tema sa iyang pagsuwat.

Balik sa umaabot na The Dream Match, pareho si Pacman ug Golden Boy nga naay bug-at nga mga rason nga makigbisog para makadaog batok sa kalaban. Si Pacman, ang pag depensa sa iyang pagka-numero uno nga pound per pound nga boksingero sa kalibutan karon. Kinahanglan d matatsahan ang record ni Manny. Kung mogawas man siyang madaogon, kini magsilbing inspirasyon na usab sa tanang mga Pinoy na boksingero nga nagsugod pa lamang. Ang kadaogan ni Manny makapausbaw usab sa morale sa mga Pinoy na boksingero na niagi ug kapildihan labi na sa morale ni Rey "Boom Boom" Bautista nga bag-o lamang napildi sa Estados Unidos.

Sa pikas na bahin, bug-at pud ug rason si Dela Hoya nganong kinahanglan niyang maangkon ang kadaogan. Gawas nga ang iyang kadaogan mahimo nyang pamawi sa iyang kapildihan kang Floyd Mayweather labwan isa ka tuig na ang milabay, mahimo pud ning akto sa iyang pagpataas sa bandila sa iyang mga ka-lahing Mexicano na niagi sa mga kamot ni Pacman ug nakatilaw sa kumo sa kapildihan.

Sigurado akong alegre kaning umaabot na panghitabo sa boxing. Ang duha ka boksingero adunay apan ug labaw. Si Dela Hoya giisip na mas hamtong na boksingero kung ikompara kang Pacquiao. Mas dako usab sya ug timbang ug lamang sya sa height apan ang Pinoy bisan gamay mas batan-on man ug sa ato pa, mas abtik. Daghang ispekulasyon ang nagbukal sa pagkakaron apil na nga dili kuno patas ang umaabot na pagsugat sa boxing ring duha ka ginganlang boksingero. Kinsa gyud kaha ang madaogon?

Pag-abot sa adlaw sa December 7, siguradong mangabanhaw na pud gikan sa mga aparador ang mga t-shirt na adunay Manny sa disenyo. Mga higala, mga officemates, kapamilya, kapuso, kapusod, magkatipon, magdungan ug atang sa dagan sa duwa. Bibo ang mga sinehan ug mga kan-anan nga mopasundayag sa event na pagahimoon sa MGM Grand Hotel and Casino didto sa Las Vegas sa Estados Unidos. Kinsa gyud kaha ang modaog? Excited na pud 'ko. Pareha nimo.

No comments:

Post a Comment

The Crossroads in a Physician's Journey

Replying to one of the emails/comments from one of our readers, Jesselyn, in  The Tipster: The Idiot's Guide to Residency. ******...